AQSh prezidentligiga Respublikachilar partiyasidan nomzod Donald Tramp va uning raqibi — demokrat Hillari Klinton o‘rtasidagi saylovoldi debatlari mamlakat tarixidagi eng reytingi yuqori telemuloqot bo‘ldi. Bu haqda Nielsen ijtimoiy tadqiqotlar kompaniyasi ma’lum qildi, deya xabar bermoqda “Interfaks”.
Nielsen ma’lumotlariga muvofiq, debatlar translyatsiya qilingan 12 ta telekanalning umumiy auditoriyasi 80,9 million kishini tashkil etdi.
Mazkur raqam 60 yildan ortiq vaqtdan beri davom etayotgan AQSh teledebatlari tarixidagi eng yuqori ko‘rsatkich hisoblanadi.
Shu bilan birga, bunda faqat uyida televizor ko‘rganlar hisobga olingani, restoran, tadqiqot bar yoki ofislarda debatlarni kuzatgan tomoshabinlarni qamrab olmagani aytilmoqda.
CNN telekanaliga ko‘ra, internet orqali ham debatlarni ko‘pchilik kuzatgan.
Jumladan, YouTube orqali translyatsiyani 2,5 million kishi ko‘rgan bo‘lsa, boshqa saytlar orqali ham nomzodlar bahsini bir necha million kishi kuzatib borgan.
Izoh (0)