Yevroittifoq Turkiyadagi suriyalik qochoqlarga har oyda 30 yevro hajmida moliyaviy ko‘mak berib turadi, deb yozadi “RBK”.
Pul qochoqlarning bank kartalariga kelib tushadi. Yordam dasturini amalga oshirish bilan Turkiyaning “Qizil yarim oy” tashkiloti va BMTning Jahon oziq-ovqat dasturi Turkiya hukumati hamkorligida shug‘ullanadi. To‘lov oktabrdan boshlanishi kerak. Dasturga Yevroittifoq jami 350 million yevro ajratadi.
Gumanitar yordam bo‘yicha yevrokomissar Xristos Stilianidis ta’kidlashicha, oylik to‘lovlar qochoqlarga biroz bo‘lsa-da, “normallik hissi”ni qaytaradi. Uning so‘zlariga ko‘ra, dastur “misli ko‘rilmagan inqirozga misli ko‘rilmagan javobdir”.
2016-yil martida Yevropa ittifoqi Turkiya bilan migratsiya inqirozini hal qilish tamoyillarini kelishib olgan edi. Bitim doirasida Gretsiyaga keladigan noqonuniy muhojirlarning barchasi Turkiyaga qaytarib yuborilishi kerak, buning uchun xarajatlarni Yevroittifoq o‘z bo‘yniga oldi.
Izoh (0)