Shu yilning 8-dekabr kuni Yaponiyada klublar o‘rtasidagi Jahon Chempionati start oladi.
Afrika, Osiyo va mezbon Yaponiya chempionlarini inobatga olmaganda, klublar mundialida ishtirok etuvchi qolgan 4 jamoa nomi ma’lum: “Real Madrid” (Yevropa chempioni), “Atletiko Natsional” (Janubiy Amerika chempioni), “Amerika” (Shimoliy Amerika chempioni) va “Oklend Siti” (Okeaniya chempioni).
Qur’aga ko‘ra, Yangi Zelandiyaning “Oklend Siti” klubi Jahon Chempionatining ilk — pley-off o‘yinida ishtirok etadi va mazkur bellashuvda unga Yaponiya chempioni raqiblik qiladi. Mazkur juftlik g‘olibi chorak finalda Afrika qit’asining bo‘lajak yetakchisi bilan bellashadi.
Chorak finalning ikkinchi o‘yinida Meksikaning “Amerika” jamoasi Osiyo Chempionlar Ligasi yetakchisini sinovdan o‘tkazadi. Toshkentning “Lokomotiv” klubi musobaqaning chorak finalida o‘z yurishiga yakun yasagani uchun, Jahon Chempionatida O‘zbekiston klubi ishtirok etmasligi aniq. Sardor Rashidov harakat qiladigan Qatarning “Al-Jaish” klubi esa mazkur turnir uchun kurashni davom ettiradi.
Yevropa va Janubiy Amerika chempionlari hisoblangan “Real Madrid” hamda “Atletiko Natsional” klublari yarim finaldan turnirga qo‘shiladi. Qayd etish kerak, Osiyo Chempionlar Ligasining g‘olibi “Amerika”ni taslim qila olsa, to‘g‘ridan-to‘g‘ri” “Real”ga raqib bo‘ladi.
14—15-dekabr kunlari yarim final uchrashuvlari o‘tkazilsa, final 18-dekabrga tayin qilingan.
Izoh (0)