Ozarbayjon Rio–2016 Paralimpiadasidan chetlatilgan rossiyalik sportchilarning uchta litsenziyasini olishdan rasman bosh tortdi, deb xabar bermoqda “Sports.ru”.
“Xalqaro paralimpiya qo‘mitasining ushbu qarorini boshidan nomaqbul deb hisobladik va litsenziyalarni qabul qilmadik. Paralimpiya o‘yinlarida faqatgina mamlakatimiz sportchilari tomonidan qo‘lga kiritilgan litsenziyalar bilan ishtirok etamiz”, – dedi Ozarbayjon Yoshlar va sport vazirligi matbuot xizmati boshlig‘i Samaya Mamedova.
Avvalroq Rossiya terma jamoasining Paralimpiya o‘yinlaridan chetlashtirilishi natijasida avstraliyalik paralimpiyachilarga qo‘shimcha 9 ta litsenziya berilgani haqida xabar qilingandi.
Eslatib o‘tamiz, 23-avgust kuni Sport arbitraj sudi (CAS) Rossiya paralimpiya termasiga 7–18-sentabr kunlari Rio-de-Janeyroda bo‘lib o‘tadigan Paralimpiya o‘yinlarida ishtirok etish uchun Xalqaro paralimpiya qo‘mitasining rossiyaliklarga nisbatan qo‘llagan qaroriga apellyatsiyasini qoniqtirmagan edi.