FIFA Vilyar, van Prag va Cheferinni UEFA prezidentligiga nomzod sifatida tasdiqladi

Xalqaro futbol federatsiyasi (FIFA)ning kuzatuv qo‘mitasi ispaniyalik Anxel Mariya Vilyar, gollandiyalik Mixael van Prag va sloveniyalik Aleksander Cheferinni UEFA prezidentligiga nomzod sifatida tasdiqladi, deb xabar bermoqda “TASS”.

Cheferin Sloveniya futbol ittifoqi prezidenti, van Prag Gollandiya qirolligi futbol ittifoqi rahbari, Vilyar esa Ispaniya qirolligi futbol federatsiyasi prezidenti sanaladi.

UEFA prezidentligi uchun saylovlar shu yilning 14-sentabr kuni Afina shahrida bo‘lib o‘tadi. Shuningdek, 2007-yildan buyon UEFA prezidenti sifatida ishlagan fransiyalik Mishel Platini o‘z lavozimidan rasman ozod etiladi.

Eslatib o‘tamiz, Fransiyalik mutasaddi 2011-yilda FIFA sobiq prezidenti Yozef Blatter Mishel Platiniga 2 million Shveysariya frankini noqonuniy ravishda o‘tkazib bergani uchun 2015-yilning dekabr oyida sakkiz yilga har qanday futbol faoliyatidan chetlashtirilgandi. Keyinchalik ushbu chetlashtirish olti yilga qisqartirildi. Shundan so‘ng, Platini Lozannadagi (Shveysariya) Sport arbitraj sudi (CAS)ga chetlashtirish muddatini qisqartirish bo‘yicha apellyatsiya berdi. Uning apellyatsiyasi qisman qondirildi – diskvalifikatsiya muddati olti yildan to‘rt yilgacha, jarima miqdori 80 mingdan 60 ming yevrogacha qisqardi.