Rossiya terma jamoasining Rio-de-Janeyro shahrida 7–18-sentabr kunlari bo‘lib o‘tadigan Paralimpiya o‘yinlaridan chetlashtirilishi natijasida avstraliyalik paralimpiyachilar qo‘shimcha 9 ta litsenziyaga ega bo‘ldi. Bu haqda Xalqaro paralimpiya qo‘mitasi (XPQ) rasmiy sayti ma’lum qildi, deb xabar bermoqda “Interfaks”.
Qo‘shimcha litsenziyalarni golbol bo‘yicha Avstraliya ayollar terma jamoasi, tennischi va ikki nafar yengil atletikachi qo‘lga kiritdi.
Avvalroq rossiyalik paralimpiyachilarning 22 ta litsenziyasi AQSh terma jamoasiga berilgani ma’lum bo‘lgandi.
23-avgust kuni Sport arbitraj sudi (CAS) Rossiya paralimpiya termasiga 7–18-sentabr kunlari Rio-de-Janeyroda bo‘lib o‘tadigan Paralimpiya o‘yinlarida ishtirok etish uchun Xalqaro paralimpiya qo‘mitasining rossiyaliklarga nisbatan qo‘llagan qaroriga apellyatsiyasini qoniqtirmagan edi.
26-avgust kuni Rossiya paralimpiya qo‘mitasi (RPQ) prezidenti Vladimir Lukin Lozannadagi Sport arbitraj sudi (CAS)ning rossiyalik sportchilarni Rio-de-Janeyro shahrida bo‘lib o‘tadigan Paralimpiya o‘yinlaridan chetlashtirish qaroriga Shveysariya federal sudiga apellyatsiya bergani haqida xabar qilingandi.
Avvalroq Xalqaro paralimpiya qo‘mitasi 35 nafar rossiyalik imkoniyati cheklangan sportchilarni xalqaro musobaqalardan chetlatishga qaror qabul qilib bo‘lgandi. Bunga asosiy sabab sifatida Xalqaro antidoping agentligi (WADA)ning mustaqil komissiyasi rahbari Richard Maklaren tomonidan sportdagi doping haqida taqdim qilingan hisoboti ko‘rsatilmoqda.
Izoh (0)