Hindiston sharqidagi G‘arbiy Bengaliya shtatidagi tartibsizliklar oqibatida kamida 1 kishi halok bo‘ldi, 13 kishi, shu jumladan, 9 nafar politsiya xodimi jarohat oldi. Bu haqda “TASS” xabar bermoqda.
Huquq-tartibot organlarining ma’lumotiga ko‘ra, Murshidobod okrugining Jxikra qishlog‘i aholisi vayron bo‘lgan elektr uzatish liniyasining tiklanishini talab qilib, 28-avgust kuni ertalab milliy shosseni o‘rab oldi. Politsiyachilarning olomon bilan muzokarasi natija bermagach, huquq-tartibot xodimlari ularni to‘qmoq bilan tarqatishga urindi. Bunga javoban qishloq aholisi politsiyachilarni toshbo‘ron qildi.Qarama-qarshilik 4 soatdan uzoq davom etdi. Ushbu vaqt mobaynida ikkita politsiya mashinasi, 15 ta yo‘lovchi avtobusi va mahalliy mansabdorning avtomobiliga zarar yetkazildi. Tartibsizlikni tashkillashtirishda gumonlanayotgan 26 nafar kishi hibsga olindi. Surishtiruv ishlari davom etmoqda.
Dastlabki ma’lumotlarga ko‘ra, Jxikradagi elektr uzatish liniyasi bir hafta oldin buzilgan edi. Mahalliy hukumatning nuqsonlarni zudlik bilan bartaraf qilish va’dasiga qaramay, qishloq aholisi elektr tarmog‘isiz qolayotgan edi.