Keniyalik sportchilarga o‘z vataniga qaytish uchun arzon chiptalar sotib olingani uchun Rio–2016 Olimpiadasi yakuniga yetgach ular Rio-de-Janeyroda otishma ovozlari ostida tunab qolishga majbur bo‘ldi, deb xabar bermoqda Meduza.
Keniya olimpiya termasining sardori, yengil atletikachi Uesli Korir Twitter’dagi sahifasiga sportchilar uchun ijaraga olingan xonadon rasmini joylashtirdi.
Olimpiya shaharchasi musobaqalar yakunlanganidan so‘ng yopib qo‘yilgani va keniyalik sportchilarning ortga qaytish chiptasi 25-avgust kuniga belgilangani uchun o‘sha yerda tunab qolgan. Korirning so‘zlariga ko‘ra, sportchilarga tunda binoni tark etmaslik tavsiya qilingan. Kechasi atletlar otishma ovozlarini eshitgan.
“Yengil atletika bo‘yicha Afrikaning eng yaxshi va dunyoning ikkinchi jamoasi. Ular esa bizga mana bunday munosabatda bo‘lmoqda”, – deya shikoyat qilib, quyidagi suratlarni Twitter’dagi sahifasiga joyladi Uesli Korir.
Korirning aytishicha, Rio—2016 ning marafonida oltin medalni qo‘lga kiritgan Eliud Kipchog o‘ziga chipta sotib olib, yurtiga qaytib ketgan. Qolgan sportchilar esa Korir bilan birga Rioda qolib ketgan.
Rio–2016 Olimpiadasida Keniya terma jamoasi 6 ta oltin, 6 ta kumush va 1 ta bronza medalini qo‘lga kiritib, Afrika qit’asi vakillari orasida eng yaxshi natijani qayd etdi.
Izoh (0)