Suzish bo‘yicha AQSh erkaklar terma jamoasi a’zolari tunab ketilgani haqida matbuot va huquq-tartibot xodimlariga tarqatgan yolg‘on xabarlar uchun Rio-de-Janeyro aholisi oldida uzr so‘rashi kerak. Bu haqda Rio-de-Janeyro politsiyasi boshlig‘i Fernandu Velozu Globo telekanaliga bergan intervyusida ma’lum qildi, deb xabar bermoqda “TASS”.
Bir necha kun avval AQSh Milliy olimpiya qo‘mitasi terma jamoaning to‘rt nafar a’zosi Rio-de-Janeyro shahrida tunab ketilgani haqida ma’lum qilgandi. Tarqalgan xabarlarga ko‘ra, Gunnar Bens, Jek Konger, Jeyms Feygen va Rayan Loxte 14-avgustga o‘tar kechasi kechki bazmdan olimpiya shaharchasiga qaytayotgan bo‘lgan. Ular o‘tirgan taksiga o‘zini politsiya xodimi deb tanishtirgan qurollangan shaxslar tomonidan hujum qilindi. Jinoyatchilar go‘yoki sportchilardan pul va boshqa shaxsiy buyumlarni talab qilgan.
Biroq huquq-tartibot xodimlari jabrlanganlarning arizasi rostligiga shubha qildi. 18-avgust, payshanba kuni sportchilar tunab ketilmagani aniqlandi. Ular yoqilg‘i quyish shoxobchasida zarar yetkazilgan mulkka pul to‘lagani ma’lum bo‘ldi.
Globo telekanalining ma’lumotiga ko‘ra, amerikalik suzuvchilar hojatxona eshigini buzgan va qo‘riqchilar bilan mushtlashgan. Yoqilg‘i quyish shoxobchasi xodimlari yetkazilgan zarar uchun pul to‘lanishini talab qilgan. Sarxush holatda bo‘lgan sportchilar qochib ketishga uringanida qo‘riqchilardan biri ularga to‘pponcha bilan tahdid qilgan.
Amerikalik suzuvchilarga nisbatan “jinoyat haqidagi yolg‘on xabar berish” moddasi bo‘yicha ish qo‘zg‘atildi. Ular 1 oydan 6 oygacha qamoq jazosiga hukm qilinishi va jarimaga tortilishi mumkin.
Izoh (0)