Yevropa Superkubogi. Ronaldu, Beyl va Kroossiz o‘ynagan “Real” “Sevilya” ustidan irodali g‘alabaga erishdi

9-avgust kuni bo‘lib o‘tgan UEFA Superkubogi o‘yini bilan Yevropada yangi futbol mavsumi rasman start oldi.

Superkubokda Yevropa Chempionlar Ligasi va Yevropa Ligasi kabi turnirlarning mos ravishdagi amaldagi g‘oliblari — “Real” hamda “Sevilya” klublari saf tortdi.

Uchrashuvning 21-daqiqasiga kelib Asensio “qirollik klubidagi” ilk rasmiy o‘yinidagi birinchi golini kiritishga muvaffaq bo‘ldi. Biroq Madrid klubi hisobdagi bu ustunlikni saqlab qola olmadi.

41-daqiqada Vaskes muvozanatni tikladi. 72-daqiqaga kelib esa ukrainalik Yevgeniy Konoplyanka penaltini aniq amalga oshirib, “Sevilya”ga g‘alaba keltirgan golga mualliflik qildi. Undan oldinroq “Real” sardori Serxio Ramos jarima maydonchasi ichida o‘yin qoidasini buzgandi.

93-daqiqaga kelibgina “Real” mag‘lubiyatdan qutulib qoldi. Serxio Ramos Lukas Vaskesning to‘p uzatishidan keyin hisobni tenglashtirishga erishdi — 2:2. Bu gol jamoalarga 15 daqiqadan yana 2 ta qo‘shimcha taym yukladi.

Qo‘shimcha daqiqalarning uchinchisida “Sevilya” futbolchilari maydonda bir kishi kam bo‘lib qoldi. Natijada 119-daqiqaga kelib “Real” bundan foydalandi va Karvaxalning goli bilan o‘z tarixida uchinchi bor Yevropa Superkubogida g‘alaba qozondi.

UEFA Superkubogi 9-avgust, seshanba

“Real” — “Sevilya” 3:2

“Real”: Kasilya, Karvaxal, Ramos, Varan, Marselo, Kazemiro, Kovachich (Xames Rodriges, 73), Isko (Modrich, 66), Asensio, Vaskes, Morata (Benzema, 62).

“Sevilya”: Riko, Vaskes, Kolodzeychak, Karrisu (Rami, 51), Parexa, Mariano Ferreyra, Iborra (Kranevitter, 74), Kiyetake, N’Zonzi, Vitolo, Vetto (Konoplyanka, 67).