Farg‘onalik dehqon bir tup olmada 25 xil navli hosilni yetishtirmoqda

Farg‘onalik omilkor dehqon Abduvahob Mirzajonov yangilikka qo‘l urib, bir tup olmada naq 25 xilga yaqin navli hosil yetishtirmoqda. Bu haqda Farg‘ona viloyati hokimligi rasmiy veb-sayti xabar berdi.

“U olim ham, seleksioner ham emas, oddiy tomorqachi. Lekin unda ishqibozlik kuchli va shu narsa unda zaminga mehr-muhabbat uyg‘otgan”, — deyiladi xabarda.

Abduvahob Mirzajonov aslida usta uzumchi sifatida nom qozongan. Uning tomorqasida 20 dan ziyod uzum navi parvarishlanyapti. Hammasi sarxil, sifatli va xaridorgir.

“Abduvahob akaning tomorqasi xuddi tajriba maydonini eslatadi. O‘zi ham olimlardek ish yuritadi, — deyiladi maqolada. — Har bitta amaliy tajribasiga belgi qo‘yib boradi. Uning bir tajriba daraxtida olxo‘rining 3 xil, o‘rikning 2 xil navi yetishtirilmoqda”.

Kashfiyotchi uzum ko‘chatlarini nafaqat bahorda, balki yilning istalgan paytida yerga o‘tqazib parvarishlash mumkinligini amaliyotda ko‘rsatmoqda. Xandon pista ko‘chatlarini mahalliy sharoitda ko‘paytiryapti. Bizning mahalliy sharoitimizga mos kelmaydi, deb hisoblangan subtropik meva turi – vitaminga boy, xushxo‘r kivi endi Oltiariqda ham o‘stirilmoqda.