Nyu-Yorkda O‘zbekiston mustaqilligining 25 yilligiga bag‘ishlangan musiqali kecha hamda uning doirasida “Bastakor Sulaymon Yudakov va uning davri” konferensiyasi bo‘lib o‘tdi. Bu haqda “Kultura.uz” xabar bermoqda.
Tadbir AQSh Buxoro yahudiylari yozuvchilari, shoirlari va jurnalistlari uyushmasi, AQSh va Kanada Buxoro yahudiylari kongressi tomonidan O‘zbekistonning Nyu-Yorkdagi bosh konsulligi bilan hamkorlikda, Bukharian Times gazetasi ko‘magida o‘tkazildi. Madaniyat markazi zaliga 25 yillik sana, shuningdek, buyuk o‘zbek bastakori Sulaymon Yudakov tavalludining 100 yilligini nishonlash uchun san’at arboblari, olim, yozuvchi, shoirlar, bastakor merosini o‘rganayotgan mutaxassislar to‘plandi.
Sulaymon Yudakovning ijod yo‘li haqidagi chiqishlardan so‘ng bo‘lib o‘tgan konsertda O‘zbekiston xalq artisti Muhabbat Shamayeva, Iosif Shalomayev, Tamara Katayeva, Yakov Xaxamov hamda boshqa xonandalar bastakor tomonidan bastalangan qo‘shiq va ariyalarni ijro etdi. Bastakor Eduard Qalandarov ijrosidagi Yudakov asarlaridan popurri yig‘ilganlar tomonidan iliq qarshi olindi.
Kecha qatnashchilarida yaqinda Toshkentda chop etilgan “Sulaymon Yudakov. Barcha davrlar uchun musiqa” kitobi katta qiziqish uyg‘otdi. Tadbir bastakorning eng yaxshi asarlaridan biri — “Jon O‘zbekiston” qo‘shig‘i ijro etilishi bilan yakunlandi.
Izoh (0)