Turkiya prezidenti Rajab Toyyib Erdo‘g‘on uni haqorat qilganlarga nisbatan da’vo arizalarini qaytarib olishini ma’lum qildi, deb xabar bermoqda “Interfaks”.
Turkiya qonunchiligida prezidentni haqorat qilish haqida modda mavjud bo‘lib, ayblanuvchi jarimaga tortilishi yoki 4 yilgacha qamoq jazosiga hukm qilinishi mumkin.
Muxolifat faollarining fikricha, ushbu modda Erdo‘g‘on tanqidchilariga qarshi kurashish uchun ishlatiladi.
2014-yildan buyon, Erdo‘g‘on Turkiyada birinchi marta o‘tkazilgan to‘g‘ridan-to‘g‘ri prezidentlik saylovida g‘alaba qozonganidan so‘ng, prezidentni haqorat qilish bo‘yicha 1 845 kishiga nisbatan ish qo‘zg‘atilgan. Bu haqda 2016-yilning mart oyida Turkiya Adliya vaziri Bekir Bozdag ma’lum qilgandi.
Ikki hafta avval Turkiya sudi Erdo‘g‘onni haqorat qilgani uchun Xalq-respublikachilar muxolifat partiyasi yetakchisi Kemal Qilichdaro‘gl‘ini 50 ming lira (taxminan 17 ming dollar) miqdorida jarimaga tortdi. Partiyadoshlari oldida qilgan chiqishida u prezidentni diktatorlikda ayblagandi.