BMT bosh kotibining Suriya bo‘yicha maxsus vakili Staffan de Mistura mamlakat shimoli-sharqidagi Al-Qamishli shahrida ro‘y bergan va o‘nlab kishilar qurbon bo‘lgan teraktni keskin qoraladi. Bu haqda “TASS” xabar bermoqda.
“Suriya bo‘yicha maxsus vakil Staffan de Mistura IShID zimmasiga olgan portlashni keskin qoralaydi. Guruh xalqaro hamjamiyat Suriyadagi mojaroni tartibga solish bo‘yicha harakatlarida ikkilanishini kutmoqda. Shu munosabat bilan vakil barcha tomonlarni siyosiy jarayonni izga solishda siljishga erishish, shuningdek, jangovar harakatlarni to‘xtatish, terrorchilikka qarshi kurashish, gumanitar karvonlarga yo‘l ochish zarurligini yana bir bor qayd etdi”, — deya ta’kidladi BMT bosh kotibi rasmiy vakilining o‘rinbosari Farxan Haq.
Oxirgi ma’lumotlarga ko‘ra, xudkush terrorchi Al-Qamishli shahrida kurdlarning o‘z-o‘zini himoya qilish kuchlari nazorat posti yaqinida minalashtirilgan yuk mashinasini portlatib yuborishi oqibatida 50 kishi halok bo‘ldi, 100 dan ortiq kishi jarohatlandi. Hujum qurbonlari orasida kurd jangchilari va tinch aholi vakillari bor.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)