Facebook’dagi “Voditeli Tashkenta” guruhida deyarli har kuni Toshkent yo‘llaridagi bahsli vaziyatlarga oid xabarlar e’lon qilinadi, bu xabarlarga foto va videodalillar ilova qilinadi.
Bu xabarlarda bir haydovchi boshqa bir haydovchining qoidaga zid harakati ustidan shikoyat qiladi yoki uchinchi bir haydovchining xatti-harakati qanchalik maqsadga muvofiqligi haqidagi savol bilan muhokama boshlaydi. Xususan, so‘nggi videoxabarlardan biri ham qizg‘in bahs-munozaraga sabab bo‘lgan.
Videoda o‘z bo‘lagidan kelayotgan avtomobil (video aynan shu avtomobildagi videoregistrator yordamida olingan) harakatiga burilishni ko‘rsatadigan miltillovchi chiroqni yoqmay, ikkinchi bo‘lakdan chiqib kelgan Matiz qisman bo‘lsa-da xalal berganini ko‘rish mumkin.
Videoregistratorli avtomobil haydovchisi avariyaviy holat oldini olish maqsadida ovozli signal bergan, shundan so‘ng Matiz haydovchisi ortidan kelayotgan mashina yo‘lini to‘liq to‘sib, avtomobilidan tushib kelgan va signal bergan haydovchi bilan munosabatlarga oydinlik kiritib olishga uringan.
Videoda ikki haydovchining suhbatini ham eshitish mumkin. Ularning muloqoti quyidagicha ko‘rinish olgan:
Video muallifi: — Yo‘l(im)ga chiqib kelyapsan-ku! Chiqadigan bo‘lsang, (miltillovchi) chiroqni yoqib chiqmaysanmi? Sening yo‘ling emas-ku.Matiz haydovchisi: — ...Chiqyapman!— Qanday chiqasan?!— Nimaga tiqilyapsan?— Meni yo‘lim-ku!— Ha, nima qilay, uyoqda (meni) siqib ketayotgan bo‘lsa?!— Chiqib kelayotganingni (bildirish uchun) hech bo‘lmasa (miltillovchi) chirog‘ingni yoq.— Qayerga yoqaman? Yoqmayman!— Nega yoqmaysan?— Yoqmasdan yuraman shunaqa!— Zo‘rmisan shunchalik?— Ha, zo‘rman! Tush, zo‘rmisan sen ham?— Nima “tush”?— Zo‘rmisan sen ham? Tush, gaplashamiz.— Joyiga borib gaplashaylikmi?— Qayerga borib gaplashasan? Xohlagan joyingda gaplashaman!— Prokuraturaga, misol uchun.— Bo‘l, ketdik, yur!— Bo‘ldi, o‘zim topib olaman seni.— Bo‘ldi, qachon topasan?— Sen yuraver, o‘zim topib olaman seni.— Qachon topasan, aqlli?— Topib olaman, yuraver sen.
Videoxabar ostida 100 dan ortiq fikr bildirilgan. Bir guruh foydalanuvchilar videoxabar muallifini tanqid qilib, kelishmovchilikni va bu videoni muhokamaga qo‘yish maqsadga muvofiq emasligini ta’kidlagan. Ba’zilar bu videoxabarning chiqarilishini “nomardlik” deb baholagan, video muallifini qo‘rqoqqa chiqarib, uni “o‘zi uchun javob berolmaydiganlar toifasidan” deb ataganlar ham bor.
“Miltillovchi chirog‘ini yoqsa, ko‘nglingingiz joyiga tusharmidi?!”, — qabilidagi fikrlarni ham ko‘plab o‘qish mumkin. Shuningdek, ba’zi foydalanuvchilar videoregistratorli avtomobildagi signalni shubha ostiga olgan — avtomobil ishlab chiqaruvchi korxona tomonidan bunday mashinalarga bunaqangi signallar o‘rnatilmasligi, signal ovozi juda balandligi ta’kidlangan. Biroq videoregistorli avtomobil rusumiga hech kim aniqlik kiritmagan.
Ayni vaqtda, aksariyat foydalanuvchilar Matiz haydovchisining xatti-harakatini qoralagan. “Signal berish mumkin bo‘lmasa endi, yaqinda yurishni ham taqiqlab qo‘yishsa kerak”, — deb yozgan foydalanuvchilardan biri. “Shunday haydovchilar ham bor — na miltillovchi chiroqni, na hurmatni biladi”, — deb yozgan boshqa bir foydalanuvchi. “Voditeli Tashkenta” guruhi a’zolari haydovchilarning o‘zaro hurmatni saqlagan holda harakat qilishi yo‘llarda shunga o‘xshash ko‘ngilsiz hodisalar oldini olishga xizmat qilishini ta’kidlagan.
Izoh (0)