AQShning Apple kompaniyasi hisob bo‘yicha milliardinchi iPhone smartfonini katta ehtimol bilan shu yilning yakunida sotadi. Bunday hisob-kitob haqida ma’lumotni Inquisitr resursi 24-iyul, yakshanba kuni chop etdi, deb xabar bermoqda “TASS”.
Ushbu taxmin Uoll-strit mutaxassislarining korporatsiya faoliyatidagi hamda Apple’ning joriy yil uchinchi choragi uchun korporativ hisobotidan kutilayotgan tahlili asosida qilingan. Mazkur hisobot 26-iyul, seshanba kuni chop etilishi kutilmoqda.
Inquisitr’ning ma’lumotlariga ko‘ra, Apple uchinchi chorak hisobotida turli modeldagi 40 million iPhone smartfonlarining sotuvi haqida e’lon qiladi. Shu tariqa, 2007-yildan buyon kompaniya tomonidan ishlab chiqarilayotgan bunday qurilmalarning umumiy soni 987 millionga yetadi. Kelasi yilning boshiga qadar ushbu ko‘rsatkich 1 milliardga teng bo‘ladi.
Shunga qaramay, bozorda iPhone’ning ko‘payib ketishi oqibatida kompaniya smartfonlariga bo‘lgan talab pasayishi kutilmoqda.