Toshkent shahar hokimligi taklifiga binoan “Savdo va xavfsizlik” ko‘rik-tanlovi o‘tkaziladi
Toshkent shahar hokimligida tashkil etilgan navbatdagi brifingda O‘zbekiston Respublikasi Vazirlar Mahkamasining 2016-yil, 21-iyul kuni qabul qilingan 237-sonli qaroriga asosan Toshkent shahar hokimligi hamda bir qator hamkor tashkilotlarning taklifiga binoan savdo sohasidagi tadbirkorlik subyektlarini qo‘llab-quvvatlash, ularni yanada rivojlantirish hamda rag‘batlantirish maqsadida ikki bosqichli “Savdo va xavfsizlik” ko‘rik-tanlovi o‘tkazilishi haqida so‘z bordi. Bu haqda Toshkent shahar hokimiyati axborot xizmati “Daryo”ga xabar berdi.
Ko‘rik-tanlov tumanlar hamda shahar bosqichlaridan iborat bo‘lib, har yili tashkil qilinadi.
Ko‘rik tanlovda savdo (bozorlar, gipermarketlar, supermarketlar, minimarketlar, kiosklar va boshqalar) hamda umumiy ovqatlanish (restoranlar, barlar, kafelar, choyxonalar va boshqalar) sohasidagi tadbirkorlik subyektlari ishtirok etadi.
Qarorga ko‘ra, bir hafta muddatda ushbu tanlovning o‘tkazilishi bilan bog‘liq tadbirlarning bosqichma-bosqich tashkiliy rejasi tasdiqlanadi.
Tanlov ochiq bo‘lib, unda barcha tadbirkorlik subyektlari ishtirok etishi mumkin. U quyidagi nominatsiyalar bo‘yicha o‘tkaziladi:
- “Eng yaxshi yirik savdo obyekti” (umumiy savdo maydoni 1500 kvadrat metrdan ortiq);
- “Eng yaxshi o‘rta savdo obyekti” (umumiy savdo maydoni 50 kvadrat metrdan 1500 kvadrat metrgacha);
- “Eng yaxshi savdo obyekti”(umumiy savdo maydoni 50 kvadrat metrgacha);
- “Eng yaxshi restoran” (restoran, vagon-restoran, bar tiplarida xizmat ko‘rsatuvchi umumiy ovqatlanish korxonalari);
- “Eng yaxshi kafe” (kafe, yozgi kafe, kafeteriy tiplarida xizmat ko‘rsatuvchi umumiy ovqatlanish korxonalari);
- “Eng yaxshi choyxona” (oshxona, choyxona, bufet va yemakxona tiplarida xizmat ko‘rsatuvchi umumiy ovqatlanish korxonalari).
