OAV: Nitssa shahri rasmiylariga 14-iyul kungi teraktning barcha videolarini yo‘q qilishga buyruq berildi
Fransiya politsiyasining aksilterror boshqarmasi Nitssa shahri rasmiylariga 14-iyul kuni terakt sodir etilgan joyda o‘rnatilgan va hodisani yozib olgan barcha kuzatuv kameralarining videolarini tezkorlik bilan olib, ularni yo‘q qilishga buyruq berdi. Bu haqda Le Figaro gazetasi shaxsiy manbasiga tayanib ma’lum qildi, deb xabar bermoqda “TASS”.
Le Figaro nashri skan qilingan buyruqning nusxasini gazetaga chop etgan. Unda qayd etilishicha, Nitssa shahri meriyasi kuzatuv kameralari 14-iyul, soat 22:30 dan, terrorchi o‘z hujumini boshlagan vaqtdan 15-iyul, 18:00 gacha yozib olgan videolarni yo‘q qilishi kerak. Shuningdek, shahar rasmiylariga voqea joyida olingan va tergovga aloqasi bo‘lmagan videolavhalar nusxalarini yo‘q qilishga ko‘rsatma berildi.
Xabarda qayd etilishicha, Nitssa meriyasida Parijdan kelgan xatdan so‘ng vahima va tushunmovchilik paydo bo‘ldi. “Bizdan birinchi marta dalillarni yo‘q qilish talab qilinmoqda. Nitssa shahri munitsipaliteti va video kuzatuv markazi buning natijasida ta’qib qilinishi mumkin. Bundan tashqari, ushbu tizim bilan shug‘ullanadigan xodimlar bunday xatti-harakatlarni amalga oshirish uchun vakolatga ega emas”, – deb ma’lum qildi tergovga yaqin bo‘lgan manba.
Nitssa shahri video kuzatuv tizimi 2010-yilda tashkil etilgan bo‘lib, Fransiyada birinchisi va eng yirigi hisoblanadi. Ayni damda shahar ko‘chalarini 24 soat davomida kuzatib boradigan 1 200 ta kamera mavjud. Video kuzatuv tizimini shahar politsiyasining 70 xodimi nazorat qiladi.
