Erdo‘g‘on Turkiyada yana davlatni to‘ntarishga urinishlari mumkinligini aytdi

Turkiya prezidenti Rajab Toyyib Erdo‘g‘on Reuters’ga bergan intervyusida mamlakatda davlat to‘ntarishiga urinish takrorlanishi mumkinligini aytdi, deb yozadi “RBK”. Shu bilan birga, u endi hukumatning ehtimoliy beqarorlikka tayyorgarligi puxtaroq ekanligini ta’kidladi.

Erdo‘g‘onning aytishicha, razvedka faoliyatida ahamiyatli kamchiliklar bo‘lgan. “Bizning razvedkamiz ishida sezilarli kamchiliklar va nuqsonlar bo‘lgani ko‘rinib turibdi, buni yashirish yoki inkor etishdan ma’no yo‘q”, — dedi u.

Prezidentning qo‘shimcha qilishicha, mamlakatda e’lon qilingan favqulodda holat rejimi uch oydan ko‘ra ko‘proqqa uzaytirilishi mumkin.

Turkiyada favqulodda holat 21-iyul, payshanba kuni mahalliy vaqt bilan soat 01:00 dan boshlab uch oy muddatga joriy etildi.