Krasnodar o‘lkasida erkak sobiq turmush o‘rtog‘ining uyida 4 kishini pichoqlab ketdi

Krasnodar o‘lkasida to‘rt kishining joniga qasd qilganlikda gumonlangan erkakni politsiya xodimlari qo‘lga oldi. Bu haqda “Interfaks” xabar bermoqda.

4-iyul, dushanba kuni ertalab Krasnoarmeysk tumanidagi uylardan birida pichoqlab ketilgan to‘rt kishining jasadi topildi. Yana bir jabrlangan ayol og‘ir jarohatlar bilan shifoxonaga yetkazildi.

Politsiya xodimlari uyni ko‘zdan kechirib, taxminiy guvohlarni so‘roq qilganidan so‘ng 39 yoshli krasnodarlik erkak sobiq turmush o‘rtog‘i va uning qarindoshlarini o‘ldirib, 3 yashar qizi bilan mashinada qochib ketganini aniqladi.

Avtomobil va haydovchi qidiruvga berildi. Bir necha soat o‘tib politsiya xodimlari mashinaning harakat yo‘nalishi va qizning joyini aniqladi. Tez orada gumonlanuvchi qo‘lga olindi, u hatto qarshilik qilishga ham ulgurmadi.

Ma’lum qilinishicha, qotillikda gumonlanuvchi erkak qizni Krasnodarga, qarindoshlari oldiga olib kelgan.

Voqea yuzasidan jinoiy ish qo‘zg‘atildi.