Toshkent shahrida 22-iyun, chorshanba kuni Shanxay hamkorlik tashkiloti (ShHT)ga a’zo mamlakatlar madaniyat vazirlarining o‘n uchinchi yig‘ilishi bo‘lib o‘tdi. Bu haqda tadbir tashkilotchilari “Daryo” internet-nashriga ma’lum qildi.
Yig‘ilishda Qozog‘iston madaniyat va sport ishlari vitse-vaziri Galim Ahmedyarov, Xitoy madaniyat vaziri Lo Shugan, Qirg‘iziston madaniyat, axborot va turizm vaziri Oltinbek Maqsutov, Rossiya madaniyat vaziri birinchi o‘rinbosari Vladimir Aristarxov, Tojikiston madaniyat vaziri Shamsiddin Orumbekzoda, O‘zbekiston madaniyat va sport ishlari vaziri Bahodir Ahmedov va ShHT bosh kotibi Rashid Alimov qatnashdi.
Bahodir Ahmedov rahbarlik qilgan yig‘ilish samimiy va do‘stona ruhda o‘tdi, unda madaniyat va san’at sohasidagi hamkorlik, avvalgi yig‘ilishlarda erishilgan kelishuvlarning bajarilishi kabi masalalar har tomonlama ko‘rib chiqildi va muhokama qilindi.
Tomonlar mehmondo‘stlik va yig‘ilishni yuqori saviyada tashkil etgani uchun O‘zbekiston Madaniyat va sport ishlari vazirligiga minnatdorchilik bildirdi, shuningdek, ShHTga a’zo mamlakatlar madaniyat vazirlarining navbatdagi yig‘ilishini 2017-yilda o‘tkazishga kelishib oldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)