AQSh Belarus rasmiylariga nisbatan sanksiyalarni yana bir yilga uzaytirdi

Barak Obama Belarus rahbariyati vakillariga nisbatan AQSh sanksiyalarini bir yilga uzaytirdi. U 10-iyun, juma kuni bu haqdagi farmonni imzoladi va Kongressga bildirishnoma jo‘natdi, deya xabar berdi “TASS”.

Farmonda “Belarus hukumatining ayrim vakillari harakatlari AQSh milliy xavfsizligi va tashqi siyosatiga favqulodda xavf tug‘dirishi” ta’kidlangan. Vashingtonga ko‘ra, “mamlakatda siyosiy ta’qiblar, jumladan, kishilarni qo‘lga olinishi va o‘g‘irlanishi bilan bog‘liq inson huquqlarining buzilishi, shuningdek, korrupsiya va davlat mulkidan noqonuniy foydalanish kabi holatlar kuzatilmoqda”.

Ilk bor shunday farmon bundan 10 yil avval, 2006-yil iyunida AQShning o‘sha paytdagi prezidenti Jorj Bush tomonidan imzolangandi. Sanksiyalar joriy etilgan Belarus rasmiylari ro‘yxatiga 10 kishi, jumladan, mamlakat prezidenti Aleksandr Lukashenko kiritilgan.

Eslatib o‘tamiz, Yevropa kengashi joriy yil fevralida  Belarus prezidenti Aleksandr Lukashenko va mamlakat mansabdorlaridan yana 169 kishiga nisbatan joriy etilgan sanksiyalarni bekor qildi.