Armanistonlik ishlab chiqaruvchi ilk smartfonlari sotuvini 6-iyundan boshlashga va’da berdi

Armanistonning Technology and Science Dynamics kompaniyasi ilk smartfonlari 6-iyundan sotuvga chiqishini e’lon qildi. Bu haqda TJournal xabar bermoqda.

6-iyun kuni kompaniyaning ArmPhone 0502, ArmPhone 0505, ArmPhone 0508, ArmPhone 0509 va ArmPhone 0520 nomlaridagi beshta smartfoni sotuvga chiqadi.

Qurilmalar displeyining diagonali 4,5–5,1 dyuym (1 920 x 1 080) orasida. Katta model 32 gigabayt ichki xotira, 3 gigabayt tezkor xotira, SD-kart uchun slot va 1,3 gigagers chastotada ishlovchi sakkiz yadroli protsessorga, kichik model esa 8 gigabayt ichki xotira, SD-kart uchun slot va 1 gigabayt tezkor xotiraga ega.

Smartfonlarning katta modeli, shuningdek, barmoq izini aniqlovchi skaner hamda 13 megapiksel va 8 megapikselli ikki kameraga ega. Kichigida 5 va 2 megapikselli kameralar mavjud.

Kompaniyaning ma’lum qilishicha, uning qurilmalari yosh arman mutaxassislari tomonidan yaratilgan bo‘lib, dunyoning yetakchi brendlaridan qolishmaydi.

Smartfonlarning narxi ma’lum qilinmayapti.