Gana poytaxti Akkradan 753 kilometr shimolda joylashgan Tamale shahri hududida noma’lum shaxslarning qurolli hujumi oqibatida bir kishi halok bo‘ldi, yana 16 kishi jarohat oldi. Bu haqda, “Sinxua” agentligi ma’lumotiga tayanib, “TASS” xabar beradi.

Agentlikning ma’lum qilishicha, 28-may, shanba kuni kechki payt noma’lum shaxslar kommunaga hujum qilganda, uning aholisi futbol bo‘yicha Yevropa Chempionlar Ligasi final o‘yinini tomosha qilayotgan edi. Guvohlarning so‘zlariga qaraganda, jangarilar elektr ta’minotini uzib qo‘yib, tomoshabinlarga qarata tartibsiz o‘q uzgan. Natijada kamida bir nafar tinch aholi vakili halok bo‘lgan, 16 kishi, jumladan, olti nafar bola, sakkiz nafar ayol va ikki erkak yaralangan.

Hodisaning yuzaga kelish sabablari hozircha noma’lum. Mahalliy aholining taxminicha, hujum kafarba va kalampor qabilalarining sardorlari o‘rtasidagi mojaro bilan bog‘liq bo‘lishi mumkin. Politsiyaning ma’lum qilishicha, jinoyat bo‘yicha surishtiruv boshlangan.