Tuvalik 16 yoshli kikbokschi musobaqa paytida ringda olamdan o‘tdi

Rossiyaning Tuva Respublikasida o‘tkazilayotgan kikboksing musobaqasida ishtirok etayotgan 16 yoshli sportchi 21 yoshli raqibidan o‘tkazib yuborgan zarbadan so‘ng olamdan o‘tdi. Bu haqda, respublika tergov boshqarmasi matbuot xizmatiga asoslanib, “TASS” xabar bermoqda.

Voqea respublikaning Dzun-Xemchik tumanida, kikboksing bo‘yicha Chadana shahri ochiq chempionati doirasidagi 54 kilogrammgacha bo‘lgan vazn toifasi jangida sodir bo‘ldi. 21 yoshli sportchi raqibining qorniga zarba berdi, buning oqibatida u hushidan ketib qoldi. Tibbiyot xodimlarining xatti-harakatlariga qaramay, yosh sportchi olamdan o‘tdi.

Voqea yuzasidan tergov oldi tekshiruvi olib borilmoqda, sud-tibbiyot ekspertizasi belgilandi, voqea guvohlari so‘roq qilinmoqda.