Rossiya prezidenti Vladimir Putin 27-may, juma kuni “Krokus-Ekspo” ko‘rgazmalar majmuida bo‘lib o‘tayotgan “Yosh professionallar” (Worldskills Russia) ishchi kasblar to‘rtinchi milliy chempionati finaliga tashrif buyurdi va final ishtirokchilari bilan muloqotda bo‘ldi. Bu haqda “RIA Novosti” xabar bermoqda.

Davlat rahbari sanoat mutaxassisliklari vakillari to‘plangan zalda “Tokarlik va frezerlik ishlari”, “Mexatronika”, “Mobil robototexnika” va “Payvandlash texnologiyalari” musobaqa maydonlaridagi ko‘rgazmalar bilan tanishdi. Musobaqalar ikki yosh toifasida — 14 yoshdan boshlab va 17 dan 22 yoshgacha bo‘lgan toifalarda o‘tkazilmoqda. Shunga qaramay, tashkilotchilarga ko‘ra, ularda bundan kichik bolalar ham ishtirok etishi mumkin. Jumladan, Putin “Mobil robototexnika” ko‘rgazmasida Krasnodar o‘lkasidan kelgan 11 yoshli ikki o‘quvchi bilan suhbat qurdi. 

U keyingi yillarda yoshlar o‘rtasida ishchi mutaxassisliklarga qiziqish ortib borayotganini qayd etdi. “Mening o‘zimga ham qiziq. Ko‘plab buyumlarni birinchi marta ko‘ryapman. Fantastikaning o‘zi!” deya hayratini yashirmagan Rossiya prezidenti.