Apple rahbari Tim Kuk XVIII asrda chizilgan rasmda iPhone’ni ko‘rgani haqida hazillashdi, deb yozadi “RBK”. Bu haqda u Amsterdamda bo‘lib o‘tayotgan Startup Fest konferensiyasida aytib o‘tdi.

Raqamli siyosat bo‘yicha sobiq yevrokomissar Neli Krusning u iPhone qayerda va qachon ixtiro qilinganini bilish-bilmasligi haqidagi savoliga javoban, Apple rahbari Reyksmyuseumdagi kartinalardan birida smartfonga o‘xshash buyumni ko‘rganini aytdi.

“Kechagi kunga qadar bilaman, deb o‘ylardim. Kecha Neli Rembrandtning asarlarini tomosha qilishga olib bordi va kartinalardan birida ko‘rgan narsamdan hayratga tushdim. Ulardan birida iPhone bor edi”, — deya aniqlik kiritdi Kuk.

Krus auditoriyaga kartinaning suratini ko‘rsatdi. “Men iPhone qachon ixtiro qilinganini bilaman deb o‘ylardim, endi bunga unchalik ishonchim komil emas”, — deya qo‘shib qo‘ydi Tim Kuk.

CNBC ta’kidlashicha, aslida gap Rembrandtning emas, gollandiyalik rassom Piter de Xoxning 1760-yilda chizilgan asari haqida bormoqda. Kartina “Erkak dahlizda ayolga maktub uzatmoqda” deb nomlanadi. Erkakning qo‘lidagi xat uzoqdan iPhone’ni eslatadi.