Tojikistonning Saylovlar va referendumlar bo‘yicha markaziy komissiyasi 23-may, dushanba kuni Konstitutsiyaga o‘zgartirishlar va qo‘shimchalar kiritish haqidagi referendumning dastlabki natijalarini e’lon qildi, deb yozadi “Kommersant”.
Respublikada ovoz berishda 4,38 million fuqaro yoki saylov ro‘yxatiga kiritilganlarning 92 foizi qatnashdi. Shularning 3 814 447 nafari yoki 94,5 foizi Konstitutsiyaga o‘zgartirish va qo‘shimchalar kiritilishini yoqlab ovoz berdi. 134 171 kishi yoki saylovda ishtirok etganlarning 3,3 foizi esa bunga qarshi ovoz berdi. “Shu tariqa, referendumga qo‘yilgan savollar bo‘yicha qaror qabul qilingan hisoblanadi”, — dedi komissiya raisi Baxtiyor Xudoyorzoda.
22-may kuni Tojikistonda mamlakat konstitutsiyasiga tuzatishlar kiritish bo‘yicha umumxalq referendumi bo‘lib o‘tdi. Tuzatishlar amaldagi davlat rahbariga Tojikiston prezidentligiga nomzodini cheklovlarsiz qo‘yish imkoniyatini beradi. Shuningdek, prezidentlikka nomzodlar uchun eng kichik yosh 35 dan 30 gacha pasaytirilishini nazarda tutadi. Mamlakat hududida milliy va diniy tamoyillarga ko‘ra siyosiy uyushmalar, partiyalar tashkil etilishiga taqiq joriy etiladi.
Izoh (0)