“Gazeta.uz” internet-nashri GM Uzbekistan yilning ikkinchi yarmidan boshlab seriyali ravishda ishlab chiqaradigan yangi avlod Chevrolet Nexia avtomobili bilan yaqindan tanishdi.

Foto: “Gazeta.uz”

Foto: “Gazeta.uz”

Nexia — GM Uzbekistan milliy avto ishlab chiqaruvchisining eng ommabop modellaridan biri sifatida ham mamlakat ichida, ham xorijda ikki o‘n yillik davomida keng foydalanib kelinmoqda. 1996 yildan buyon faqatgina O‘zbekistonning o‘zida 1 million dona birinchi va ikkinchi avlod Nexia (N150) avtomobili sotildi.

2016 yilda avtomobil tarixida yangi bosqich boshlanadi — yilning ikkinchi yarmida GM Uzbekistan yangi avlod Chevrolet Nexia’ni seriyali ishlab chiqarishni yo‘lga qo‘yadi. Bu navbatdagi restayling emas, balki xavfsizlik, qulaylik va zamonaviy darajada jihozlangan butunlay yangi avtomobil hisoblanadi.

Zamonaviy va texnologik

N150 modelidan farqli ravishda, yangi Nexia ABS va haydovchi xavfsizlik yostig‘i bilan ta’minlangan (eng yuqori pozitsiyada qo‘shimcha opsiya sifatida old yo‘lovchi uchun ham xavfsizlik yostiqchasi mavjud). Mashina, shuningdek, immobilayzer, kunduzgi old chiroqlar (DRL) hamda Isofix bolalar o‘rindiqlari uchun mustahkamlagichlar bilan ta’minlangan.

Model GM Powertrain-Uzbekistan QK tomonidan ishlab chiqarilgan sig‘imi 1,5 litrga teng, 16 klapanli 109 ot kuchiga ega benzinli S-TEC III dvigateli va besh bosqichli mexanik yoki olti bosqichli avtomat tezlik uzatmalar qutisi bilan ta’minlangan. Uchinchi LTZ pozitsiyada (tiptronik funksiyali) avtomat tezlik uzatmalar qutisi mavjud bo‘lib, mazkur pozitsiyada mexanik tezlik uzatmalar qutili mashinalar ham taqdim etiladi.

Konditsioner yoqilganda va uch yo‘lovchi bo‘lganda avtomobil epchillik bilan, zo‘riqishsiz tezlik oldi. “Eski” Nexia bilan solishtirilganda, yangi mashina qariyb shovqin solmasdan harakatlandi.

Foto: “Gazeta.uz”

Foto: “Gazeta.uz”

Eksteryer va interyer

Uchinchi avlod Nexia avtomobili yangi radiator panjarasi, yangicha asosiy va tumanga qarshi chiroqlar, DRL hamda quyma po‘lat disklarga (yuqori pozitsiyada) ega. Old bamper piyodalarni himoya qilish talablariga javob beradi.

Mashina 11 rangda taqdim etiladi (shulardan 4 tasi — yangi ranglar). Tom ostida ko‘proq joy bor; haydovchi o‘rindig‘i past-balandlik bo‘yicha sozlanishi mumkin.

To‘rt kegayli rul chambaragi Lacetti’niki bilan bir xil. Rul ustunini ham past-balandlik bo‘yicha sozlash mumkin. Uchinchi pozitsiyada rul chambaragida audiotizimni boshqarish moduli mavjud.

Audiotizimda Bluetooth, AUX, handsfree bor. USB porti to‘xtash tormoz dastasi yonida qulay qilib joylashtirilgan. Hajmi 400 litr bo‘lgan yukxona kalit va haydovchi eshigidagi tugma orqali ochiladi.

Foto: “Gazeta.uz”

Foto: “Gazeta.uz”

Umumiy taassurotlar

“Gazeta.uz”ning yozishicha, yangi avtomobil vaqt sinovidan o‘tgan Nexia ning munosib vorisi bo‘la olishi shubhasiz. Zamonaviy tashqi qiyofasi va so‘nggi talablar asosida jihozlangan model ham milliy, ham xorijiy xaridorlar o‘rtasida keng ommalashuviga zamin yaratadi.

Yangi Nexia’ning ko‘proq suratlarini “Gazeta.uz”da tomosha qilish mumkin.