Xitoy Amerikaning “Jon Stennis” aviatashuvchisiga Gonkong portiga kirishga ruxsat bermadi. Bu haqda 29-aprel, juma kuni South China Morning Post nashri ma’lum qildi, deb xabar beradi “Interfaks”.

Amerikaning Gonkongdagi konsulligi vakilining so‘zlariga qaraganda, Xitoy tomoni ruxsat berilmaganlik sababini ma’lum qilmadi. XXR Tashqi ishlar vazirligi rad etish haqidagi xabarni AQShga yetkazdi.

Nashrning ta’kidlashicha, 15-aprel kuni aviatashuvchiga AQSh Mudofaa vaziri Eshton Karter tashrif buyurgan. Unga filippinlik hamkasbi Volter Gazmin hamrohlik qilgan.

XXR va Janubi-Sharqiy Osiyo davlatlari ittifoqi — Filippin, Malayziya, Bruney va Vyetnam Janubiy Xitoy dengizidagi Nansha arxipelagi bo‘yicha hududiy munozaralarni olib bormoqda. AQSh bu bahsda Janubi-Sharqiy Osiyo davlatlari ittifoqini qo‘llab-quvvatlamoqda.