Futbol bo‘yicha JCh—2018 3-saralash bosqichi arafasida turgan O‘zbekiston milliy terma jamoasi 2016-yil hisobidan Toshkentda birinchi bor o‘rtoqlik o‘yini o‘tkazishi mumkin.
Norasmiy ma’lumotga ko‘ra, 2-iyun kuni terma jamoa Toshkentda o‘yin o‘tkazadi. Bellashuvning o‘tish yoki o‘tmasligi, unda raqib kim bo‘lishi haqida rasmiy ma’lumot yo‘q. Tasdiqlanmagan xabarga ko‘ra, Samvel Babayan jamoasi 2-iyundagi ehtimoliy o‘yindan keyingina Avstriyaga jo‘nab ketadi hamda 7-iyun kuni Kanadaga qarshi saf tortadi.
Osiyo Futbol Konfederatsiyasi tasarrufidagi terma jamoalardan Avstraliya, Yaponiya, Saudiya Arabistoni, BAA, Iroq, Tailand kabi mamlakatlar 2-iyun kuni yoki shu kun arafasida o‘rtoqlik o‘yinida maydonga tushadi. Janubiy Koreya, Eron, Xitoy, Qatar, Suriya kabi terma jamoalar esa JCh—2018 3-saralash bosqichida O‘zbekiston bilan bir guruhdan joy olgan.2-iyun kuni Yevropa qit’asining ko‘zga ko‘ringan terma jamoalari Yevro—2016 turniri oldidan o‘rtoqlik o‘yinlarini kelishib qo‘ygan. Afrika mamlakatlari esa qit’a chempionatining saralash o‘yinlarida maydonga tushadi. Shundan kelib chiqib, O‘zbekiston terma jamoasi Toshkentdagi o‘rtoqlik o‘yiniga munosib raqib topa olmasligi ham mumkin.
Ma’lumot uchun, O‘zbekiston milliy terma jamoasi 2007-yildan buyon 12 ta o‘rtoqlik uy o‘yinida ishtirok etgan. 2010, 2011, 2013-yillari O‘zbekiston milliy terma jamoasi o‘z maydonida o‘rtoqlik uchrashuvi o‘tkazmagan.
Izoh (0)