Milliarder va Icahn Enterprises ko‘p profilli xoldingining asosiy xo‘jayini Karl Aykan (Forbes global reytingida 17 milliard dollarlik davlati bilan 43-o‘rinda joylashgan) endi Apple aksiyalariga egalik qilmaydi. Bu haqda uning o‘zi CNBC bilan suhbatida aytib o‘tdi, deb yozadi “RBK”.
“Apple’da endi o‘rnimiz yo‘q”, — dedi Aykan, Apple “katta kompaniya” ekanligini, uning bosh direktori Tim Kuk esa “ajoyib ish ko‘rsatayotgani”ni ta’kidlar ekan.
O‘z qarorini izohlab, Aykan Apple’ning Xitoydagi holati yuzasidan xavotir bildirdi. Investorni Xitoy hukumati Apple biznesiga cheklov qo‘ya olishi, bu esa savdo darajasiga ta’sir o‘tkazishi mumkinligi tashvishlantirmoqda.
Shu bilan birga, Aykan Xitoydagi iqtisodiy o‘sish sekinlashgani uni xavotirga solmayotganini tan oldi.
Eslatib o‘tamiz, avvalroq Xitoyda 2016-yil martda kuchga kirgan internetga kontent joylashtirishning yangi qoidalariga ko‘ra, Apple mamlakatda iBooks Store va iTunes Movies servislarini yopishga majbur bo‘lgan edi.
Izoh (0)