Fransiya rasmiylari so‘rovlariga ko‘ra Belgiyadan ekstraditsiya qilingan Saloh Abdislomga rasman terrorizmda ayblov e’lon qildi. Bu haqda uning advokati Frank Berton ma’lum qildi, deb xabar beradi “TASS”.

Parijdagi teraktlarni tashkillashtirishda ishtirok etganlikda ayblangan Abdislom Fransiya hududiga keltirilganidan so‘ng poytaxtdan 30 kilometr janubda joylashgan Fleri-Merojis qamoqxonasining bir kishilik kamerasiga joylashtirildi.

Mamlakat adliya vaziri Jan-Jak Yurvoasning bildirishicha, uni hibsda saqlab turish uchun favqulodda xavfsizlik choralari ko‘riladi. Jumladan, xavfli jinoyatchilar bilan ishlash bo‘yicha maxsus tayyorgarlikdan o‘tgan alohida qo‘riqlash guruhiga Abdislomni nazorat etish topshiriladi.