Foydalanuvchi surati ustiga turli effektlar qo‘yadigan ommaviy MSQRD mobil dasturining belaruslik mualliflari Facebook bosimi ostida ayrim tasvirlarni chiqarib tashlashga majbur bo‘ldi. Bu haqda TJournal xabar bermoqda.
Yaqindan beri MSQRD dasturida Barak Obama, Leonardo Di Kaprio va hindular qiyofasi yo‘qoldi, Snup Dog niqobi esa reperga xos yuz rangidan mahrum bo‘ldi. Ularning o‘rniga ba’zi yangi filtrlar, jumladan, Facebook belgisi tushirilgan kepka paydo bo‘ldi, Stalinning niqobi esa qoldi.
MSQRD asoschilaridan biri va bosh direktori Yevgeniy Nevgenning aytishicha, mazkur niqoblarni olib tashlash haqida qaror qabul qilinishiga Facebook bilan birlashuv sabab bo‘ldi.
Facebook MSQRD dasturini sotib olgani haqida o‘tgan oyda ma’lum qilingandi. Kelishuv summasi oshkor etilmagan, biroq startap asoschilari ijtimoiy tarmoqning Londondagi ofisiga ishga o‘tishi bildirilmoqda.
Izoh (0)