Apple smartfonlar bozorida yana Samsung’dan ortda qoldi
TrendForce tahlil kompaniyasi smartfonlar savdosi keskin tushib ketganidan dalolat beruvchi tadqiqot natijalarini e’lon qildi, deb yozadi “Hi-tech.mail.ru”. Ekspertlar ta’kidlashicha, 2016-yilning birinchi choragida iPhone savdosi ayniqsa shiddat bilan tushib ketdi, va bu Samsung’ga Apple’ni ancha ortda qoldirish imkonini berdi.
2016-yilning dastlabki uch oyi davomida dunyoda 292 mingga yaqin smartfon chiqarilgan. O‘tgan yilning shu davriga nisbatan qisqarish sezilarsiz — atigi 1,3 foiz. Biroq ma’lumotlarni o‘tgan chorak ko‘rsatkichlari bilan qiyoslaganda, savdo hajmi 18,6 foizga pasayib ketganini ko‘rish mumkin.
Smartfonlar bozorida, 2016-yilning birinchi choragi yakunlariga ko‘ra, birinchi o‘rinni 27,8 foiz natija bilan hamon Samsung egallamoqda. O‘tgan chorakda uning hissasi 22,1 foizni tashkil etgan edi.
Apple esa ikkinchi o‘rinda qolmoqda, ammo uch oy avval uning smartfonlar bozoridagi hissasi 20,9 foizdan iborat bo‘lgan bo‘lsa, endi ushbu ko‘rsatkich 14,4 foizga tushib qoldi.
Reytingning uchinchi pog‘onasida Huawei (9,3%), keyingi o‘rinlarda esa Lenovo (5,8%), Xiaomi (5,5%) va LG (5,1%) joylashdi.
TrendForce eksperti Avril Vu aytishicha, iPhone 6s’ga bozorda talab yo‘q. U iPhone 6’ga o‘xshaydi va o‘rtacha xaridorga haqiqatda kerak bo‘lgan qo‘shimcha funksiyalarga deyarli ega emas.
Martda chiqarilgan iPhone SE Apple savdolarini iPhone 7 chiqquniga qadar ushlab turadi. Biroq yangi 4 dyuymli smartfon Xitoy brendlarining modellari bilan raqobat kurashiga duch kelib bo‘ldi va o‘rtacha narx segmentida yetakchi o‘rinlarni egallamay qo‘ydi.
