O‘zbekistonda 10-apreldan 10-maygacha “Toza havo” tadbirining birinchi bosqichi o‘tkaziladi. Bu haqda “Turkiston-press”ga tayanib, “Gazeta.uz” xabar bermoqda.
Avtomobillarni dvigateldan chiqqan gazlar toksik xususiyati va tutuni bo‘yicha monitoringdan o‘tkazish bo‘yicha operatsiya Tabiatni muhofaza qilish davlat qo‘mitasi tomonidan IIV Yo‘l harakati xavfsizligi bosh boshqarmasi va Sog‘liqni saqlash vazirligi Davlat sanitariya epidemiologiya nazorati markazi bilan hamkorlikda o‘tkaziladi. Tadbirga bag‘ishlab Toshkentda o‘tkazilgan seminarda ta’kidlanishicha, “Toza havo” oyligini o‘tkazish bo‘yicha axborot kampaniyasiga Facebook’dagi “Voditeli Tashkenta” guruhi ham qo‘shilgan.
Tadbir davomida havoga ko‘p miqdorda zararli tashlanmalar chiqaradigan karbyurator dvigatelli va dizel avtomobillariga alohida e’tibor qaratilishi ko‘zda tutilgan. Ma’lumot uchun, o‘tgan yili O‘zbekistonda 7 mingga yaqin transport vositasi gaz yoqilg‘isiga o‘tkazilgan, bu esa o‘z navbatida, havoga chiqariladigan zararli tashlanmalar miqdori 8 ming tonnadan ziyodga kamayishiga olib kelgan.
Izoh (0)