2016-yilning 15-sentabridan 2-oktabrigacha Hindistonda bo‘lib o‘tadigan Osiyo chempionatiga tayyorgarlik ko‘rayotgan O‘zbekiston o‘smirlar (U-16) terma jamoasi 8-aprel, juma kuni o‘zining navbatdagi o‘quv-mashg‘ulot yig‘inlariga kirishadi, deb xabar bermoqda O‘zbekiston futbol federatsiyasi matbuot xizmati.

Ushbu yig‘in Toshkentda bo‘lib o‘tadi va 15-aprelga qadar davom etadi. Bir hafta bo‘lib o‘tadigan tayyorgarlikning ushbu bosqichi davomida Temur Olimxo‘jayev boshchiligidagi jamoa Polsha o‘smirlar termasi bilan ikkita nazorat uchrashuvi o‘tkazadi.

Polshaga qarshi dastlabki o‘yin 13-aprel, chorshanba kuni soat 16:00 da boshlansa, ikkinchi uchrashuv 15-aprel, juma kuni 16:00 da start oladi. Har ikki o‘yin ham Toshkentdagi “Jar” stadionida bo‘lib o‘tadi.

Ta’kidlash kerakki, 16 yoshgacha bo‘lgan futbolchilar o‘rtasidagi Osiyo chempionatida 16 mamlakatning o‘smirlar terma jamoasi ishtirok etadi.

Ushbu turnirga saralash bahslari davomida Temur Olimxo‘jayev boshchiligidagi terma jamoa Maldiv (8:0), Falastin (6:0) hamda Yaman (5:2) terma jamoalari ustidan g‘alaba qozonib, “A” guruhi g‘olibi sifatida Osiyo chempionatiga yo‘l olgandi.