O‘zbekistonlik tennischi Denis Istomin Marokash Qirolligining Marokash shahrida davom etayotgan, sovrin jamg‘armasi 520 070 yevroni tashkil etuvchi Grand Prix Hassan II tennis turnirida o‘z ishtirokini yakunladi.

Musobaqa rasmiy saytining ma’lum qilishicha, 29 yoshli o‘zbekistonlik tennischi yakkalik bahslari ikkinchi davrasida ispaniyalik Pablo Karreno-Bustaga qarshi bahs olib bordi va 3:6, 6:7 hisobida mag‘lubiyatga uchradi.

Dastlabki davrada Denis Istomin italiyalik Lorenso Jyustino ustidan 7:6, 6:4 hisobida g‘alaba qozongan edi.

Hindistonlik Rohan Bopanna bilan tandem hosil qilgan Istomin jutfliklar bahsi yarim finalida xorvatiyalik Marin Draganja hamda pokistonlik Aysam Qurayshi duetiga qarshi kortga chiqdi. Unda 7:6, 7:6 hisobi qayd etilib, Draganja/Qurayshi juftligi foydasiga hal bo‘ldi.

Eslatib o‘tamiz, juftliklar bahsi yarim finaliga qadar Istomin/Bopanna juftligi fransiyalik Fabris Martin va avstriyalik Oliver Marak juftligini 6:4, 6:2, ispaniyalik Pablo Karreno-Busta va Inigo Servantes duetini esa 6:3, 7:6 hisobida mag‘lubiyatga uchratgan edi.

Ma’lumot o‘rnida, Grand Prix Hassan II turnirining yakkalik bahslari ikkinchi davrasiga qadar yetib borgan tennischilar 7 900 yevro mukofot puli va 20 reyting ochkosi bilan taqdirlanadi.