Eron prezidenti Hasan Ruhoniy ozarbayjonlik hamkasbi Ilhom Aliyev bilan telefon suhbati chog‘ida Qorabog‘ mojarosi hududida o‘t ochishni to‘xtatish haqida kelishuvga erishilganini ma’qulladi, deya xabar bermoqda “TASS” Ozarbayjon davlat rahbari matbuot xizmatiga tayanib.

Suhbat Eron prezidenti tashabbusi bilan bo‘lib o‘tdi. U Armaniston va Ozarbayjon qo‘shinlari tutashgan chegarada bo‘lib o‘tgan so‘nggi hodisalar yuzasidan xavotir bildirdi va tomonlar o‘rtasida o‘t ochishni to‘xtatish haqida bitim imzolanganini ma’qulladi.

Aliyev “Ozarbayjon hamisha Tog‘li Qorabog‘ mojarosini tinch yo‘l bilan hal etish tarafdori bo‘lgani, ammo Armaniston doim konstruktiv bo‘lmagan pozitsiyani egallab, o‘t ochishni to‘xtatish rejimiga rioya qilmay kelgani”ni ta’kidladi.

Ozarbayjon yetakchisi aytishicha, 7-aprelda Ozarbayjon, Rossiya va Eron tashqi ishlar vazirlarining Bokudagi uch tomonlama uchrashuvi “mintaqadagi xavfsizlik va hamkorlikka o‘z hissasini qo‘shadi”.