AQSh davlat kotibi Jon Kerri Qorabog‘ nizosi tomonlarini o‘t ochishni to‘xtatish haqidagi bitimga rioya qilishga va muzokaralar boshlashga chaqirdi, deb yozadi “Interfaks”.

“AQSh eng qat’iy tarzda Tog‘li Qorabog‘ga tutash chegara bo‘ylab o‘t ochishni to‘xtatish rejimining keng ko‘lamda buzilishini qoralaydi. U oddiy aholi orasida ham qurbonlar bo‘lishiga olib keldi. Biz barcha jabrlangan oilalarga hamdardlik bildiramiz”, — deyiladi Kerrining bayonotida.

Uning so‘zlariga ko‘ra, “tomonlar Yevropada xavfsizlik va hamkorlik tashkilotining Minsk guruhi raisdoshlari rahbarligida nizoni har tomonlama tartibga solish masalalari bo‘yicha zudlik bilan muzokaralarga kirishishi kerak”.

“Nizoni harbiy yo‘l bilan hal qilib bo‘lmasligini ta’kidlaymiz. Raisdosh (YeXHTning Minsk guruhidagi) mamlakat sifatida, AQSh tinchlikka muzokaralar yo‘li bilan erishish uchun tomonlar bilan ishlash tarafdori”, — dedi davlat kotibi.