Toshkent shahrida mavjud tramvay yo‘llarini demontaj qilish ishlari davom etmoqda. “Gazeta.uz”ning xabar berishicha, “Toshkent” vokzali bilan Taraqqiyot ko‘chasi (sobiq ToshMI) oralig‘idagi bo‘lak buzib tashlanayotgan tramvay yo‘llarining navbatdagisi bo‘ldi.
Xabar berishlaricha, 23-mart, chorshanba kuni oqshomda tramvay simlari olib tashlangan, 24-mart kuni ertalabdan esa vokzal oldidagi Turkiston ko‘chasidan o‘tgan relslarni olib tashlashga tayyorgarlik boshlangan edi.
Kichik halqa yo‘li bo‘ylab Temiryo‘l muzeyidan eski ToshMIga qadar cho‘zilgan bu tramvay yo‘li bo‘lagi 2011-yilda qurilgan edi. Shahardagi eng talabgir hisoblangan 13-tramvay yo‘lining vokzaldan TTZ dahasiga qadar bo‘lgan qismi qisqartirilganidan so‘ng, shahar ma’muriyati Taraqqiyot ko‘chasidan Yangiobod (Rohat) dahasiga qadar davom etuvchi yangi tramvay yo‘li qurilishi haqida ma’lum qilgandi. Biroq keyinroq bu rejadan voz kechilgani ma’lum bo‘ldi.
“Gazeta.uz” ma’lumotlariga ko‘ra, 1-apreldan 12-tramvay yo‘nalishi (“Beruniy” metrosi — “Ibn Sino” — “Beshqayrag‘och”) yopilishi mumkin. “Gazeta.uz”ning “Toshshahartransxizmat”, “Toshkent tramvayi” kompaniyalaridagi manbalari, tramvay haydovchilari, depo xodimlari, dispetcherlarga asoslanib xabar berishicha, Qo‘yliq-6 dahasidan “Toshkent” vokzaliga qatnovchi 26-tramvay yo‘nalishi ham yopilishi mumkin.
Izoh (0)