Lukas Braun doping mojarosi borasida rasmiy bayonot berdi
Hatton Promotions promouterlik kompaniyasi professional boksning superog‘ir vazn toifasida Jahon boks assotsiatsiyasi (WBA)ning muntazam chempioni Lukas Braunning doping mojarosi borasidagi rasmiy bayonotini e’lon qildi. Bu haqda “Olamsport” xabar bermoqda.
5-mart kuni superog‘ir vazn toifasida chempionlik kamarini o‘zbekistonlik bokschi Ruslan Chagayevdan tortib olgan avstraliyalik charm qo‘lqop ustasi doping iste’mol qilganlikda ayblangandi.
“Barchani ishontirib shuni ayta olamanki, men taqiqlangan moddalar iste’moliga qarshiman va hech qachon bunday pastkashlikka yo‘l qo‘ymayman. Shu o‘rinda bir narsani aytishim kerak, men va jamoam Checheniston hududida jang o‘tkazish katta tavakkal ekanini oldindan bilgan edik. Lekin voqealar rivoji bu darajada o‘zgarib ketishini xayolimga ham keltirmagandim.
Shuningdek, aynan mening jamoam doping masalasiga jiddiy e’tibor qaratgan va ixtiyoriy doping nazoratidan o‘tish assotsiatsiyasi, ya’ni VADA xizmatiga murojaat qilgandi. Hozircha shu gaplarni aytish bilan chegaralanaman. Tez orada barcha masalaga oydinlik kiritiladi”, — deyiladi Braunning bayonotida.
Eslatib o‘tamiz, avstraliyalik 36 yoshli bokschidan olingan doping tahlilida klenbuterol moddasi borligi aniqlangan edi. Bu esa Xalqaro antodoping agentligi (WADA) tomonidan taqiqlangan moddalar qatoriga kiritilgan.
