Yo‘lovchi samolyotlarida yo‘lovchilar va ekipaj a’zolari litiy-ionli batareyalarni shaxsiy elektron qurilmalari orasida tashishi mumkin. Bu haqda Xalqaro fuqarolik aviatsiyasi tashkiloti (ICAO)ga tayanib, “TASS” xabar qilmoqda.
Oldinroq ICAO litiy-ionli akkumulyatorlar partiyasini yo‘lovchi samolyotining yuk bo‘lmalarida tashishni vaqtincha taqiqlagandi. Yuk samolyotlarida bunday tovarlarni tashish taqiqlanmaydi.
“Cheklov faqat yo‘lovchi samolyotlarida yuk sifatida tashiladigan litiy-ionli batareyalarga daxldor va u yo‘lovchi hamda havo kemasi jamoasining shaxsiy elektron qurilmalariga nisbatan qo‘llanilmaydi”, — deyiladi tashkilot xabarida.
ICAO mutaxassislarining fikricha, zamonaviy maishiy elektron texnikada qo‘llaniladigan litiy-ionli batareyalar o‘z-o‘zidan o‘t olishi va yong‘in keltirib chiqarishi mumkin. Bu esa parvoz chog‘ida havo transportiga nisbatan jiddiy xatarni keltirib chiqaradi. Taqiq 2016-yil 1-apreldan boshlab kuchga kiradi.
Xalqaro tashkilotning cheklov choralari majburiy kuchga ega bo‘lmay, tavsiya xarakteridagi hujjat hisoblanadi. Shunga qaramay, ko‘pchilik davlatlar odatda uning tavsiyalariga amal qiladi.
Izoh (0)