“Roskomnadzor” Qodirovning “chiyabo‘rilar” haqidagi maqolasida qonunbuzarlik ko‘rmadi

Rossiya aloqa, axborot texnologiyalari va ommaviy kommunikatsiyalar sohasidagi nazorat xizmati (“Roskomnadzor”) Checheniston rahbari Ramzan Qodirovning “Izvestiya” gazetasida chop etilgan, muxolifat tanqidiga bag‘ishlangan maqolasida qonunchilikka zid jihatlarni topmadi, deb xabar beradi Meduza.

Muqaddam jurnalist Andrey Konyayev idoraga Qodirovning “Chiyabo‘rilar Rossiya Federatsiyasi qonunchiligiga muvofiq jazolanadi” nomli maqolasi ustidan arz qilgandi. Ammo “Roskomnadzor”da’vogarga yo‘llagan javob xatida siyosatchi axborot erkinligi qonunchiligiga zid ish qilmagani ta’kidlandi. Andrey Konyayev Twitter’dagi sahifasida unga yuborilgan javob xatining elektron nusxasini joylashtirdi.

Ramzan Qodirov oxirgi paytlarda muxolif kuchlar haqida bir qancha shov-shuvli bayonotlar berdi. Bundan tashqari, “Izvestiya” gazetasida shu ruhdagi maqola e’lon qildi, shuningdek, Instagram’dagi sahifasida muxolif siyosatchi Mixail Kasyanov snayper “nishoniga olingan” videolavhani joylashtirdi.