Fransiya 30 ming nafar qochoqdan ortig‘ini qabul qilishdan bosh tortdi

Fransiya Yevropa Ittifoqi kvotasida belgilangan 30 ming nafar qochoqdan ziyodini qabul qilmaydi. Bu haqda mamlakat bosh vaziri Manuel Vals Myunxenda o‘tkazilgan xavfsizlik bo‘yicha anjumanda ma’lum qildi, deya xabar beradi “Vedomosti”.

“Muammoning yechimi Levante, Turkiya, Iordaniya va O‘rtayer dengizida. Bizning qarorimiz aniq: belgilanganidan ortiq qochoqlarni qabul qilmaymiz”, — deya ta’kidlagan Vals.

O‘tgan yil sentabrida YeI qochoqlar soni bo‘yicha kvotalarni taqsimlagan, unga ko‘ra, ittifoqdagi davlatlar jami 120 ming kishini qabul qilishi belgilangandi. Biroq ayrim mamlakatlar bunga qarshi chiqib, Lyuksemburgdagi Yevropa adliya sudiga murojaat etishga qaror qilgan.