Oksana Chusovitina Xyustonda o‘tkazilgan Gran-pri turnirida oltin medalni qo‘lga kiritdi

O‘zbekistonlik tajribali gimnastikachi Oksana Chusovitina o‘zining navbatdagi g‘alabasini qo‘lga kiritdi. AQShning Xyuston shahrida sport gimnastikasi bo‘yicha kechgan Gran-pri turnirida Oksana ikkita medalga sazovor bo‘ldi, deb xabar beradi “Sports.uz”.

Oksana tayanib sakrash bahslarida oltin medalga sazovor bo‘ldi. 40 yoshdan oshgan sportchi ko‘pkurashda ham muvaffaqiyatli qatnashib, barchani yana bir bor lol qoldirdi. Ko‘pkurash yakuni bo‘yicha Chusovitina shohsupaning ikkinchi pog‘onasidan joy oldi.

Chusovitina aprel oyida bo‘lib o‘tadigan Olimpiada saralash bosqichida olimpiya o‘yinlari litsenziyasini qo‘lga kiritish uchun asosiy da’vogar ekanligini isbotladi. Ungacha o‘zbekistonlik gimnastikachi kelasi oy oxirlarida Bokuda o‘tadigan jahon kubogi bosqichida ham o‘z omadini sinab ko‘rishi mumkin.