O‘zMTRK “Sport” telekanalidagi “Futbol sharhi” ko‘rsatuvi bahorda efirga qaytishi mumkin. Bu haqda “Daryo”ning “Sport” telekanalidagi manbalari ma’lum qildi.
Qayd etishlaricha, shu vaqtgacha 2015-yil oxirigacha Zafar Imomxo‘jayev muallifligida efirga chiqqan “Futbol sharhi” dasturi futbol bo‘yicha 2016-yilgi Oliy Liga o‘yinlari start olganidan so‘ng, boshqa nom, boshqa boshlovchi bilan efirga qaytishi mumkin.
Avvalroq Zafar Imomxo‘jayev, shuningdek, Diyor Imomxo‘jayev o‘z xohishiga ko‘ra ariza yozib, “Sport” telekanalidagi faoliyatini to‘xtatgani, ularning mualliflik ko‘rsatuvlari to‘xtatilgani haqida xabar berilgan edi.
Qayd etish joiz, “Futbol sharhi” futbol bo‘yicha O‘zbekiston chempionati, shuningdek, O‘zbekiston milliy terma jamoasi uchrashuvlari va o‘zbek futbol klublarining xalqaro maydondagi ishtiroki tahliliga bag‘ishlangan ko‘rsatuv edi.
Ma’lumot uchun, futbol bo‘yicha 2016-yilgi O‘zbekiston chempionati bahslari bahorda boshlanishi kutilmoqda.
Izoh (0)