7 yildan beri birinchi marta Saudiya Arabistoniga kelgan Xitoy rahbari ar-Riyodda 14 ta hujjatni imzoladi
Saudiya Arabistoni qiroli Salmon bin Abdulaziz ar-Riyodda Xitoy xalq respublikasi raisi Si Szinpin bilan muzokaralar o‘tkazdi. Ularning yakuni bo‘yicha tomonlar o‘rtasida 14 ta kelishuv va memorandum imzolandi, deya xabar beradi “TASS”.
Muzokaralarning bosh mavzularidan biri terrorizmga qarshi kurash bo‘ldi. Imzolangan hujjatlarning aksariyati ikki tomonlama, xususan, energetika sohasidagi hamkorlikni rivojlantirishga taalluqli ekanligi aytilmoqda. Shuningdek, ilmiy-texnik yo‘nalishdagi, jumladan, sun’iy yo‘ldosh navigatsiyasi bo‘yicha aloqalarni kengaytirish haqida kelishib olindi. Xitoy va Saudiya vakillari yuqori haroratli yadro reaktori qurish to‘g‘risida memorandumga ham imzo chekdi.
Xitoy rahbarining 7 yildan beri birinchi marta Saudiya Arabistoniga kelgani Yaqin Sharq OAVda katta qiziqish uyg‘otdi. Mintaqaviy safarini ar-Riyoddan boshlagan Si Szinpin Misr va Eronga ham tashrif buyuradi.
