Xitoyda ustunlarining oralig‘i dunyodagi eng uzun temiryo‘l ko‘prigi qurildi

Xitoy janubi-g‘arbida ustunlarining oralig‘i dunyo bo‘yicha eng uzun bo‘lgan temiryo‘l ko‘prigi qurildi. Bu haqda “TASS” xabar bermoqda.

Ko‘prik Yunnan viloyatida barpo etildi, u Nanpanszyan daryosining ikki qirg‘og‘ini birlashtirib turadi. Besh yil davomida qurilgan temir-beton ko‘prik suv sathidan 270 metr balandlikda joylashgan, uning asosiy ustunlari orasidagi masofa 416 metrni tashkil etadi.

Yangi ko‘prik Yunnan markazi Kunmin va qo‘shni Guansi-Chjuan muxtor tumani markazi Nannin shaharlari orasida qatnovchi yo‘lovchi hamda yuk poyezdlari harakatini tezlashtirish imkonini beradi. Endi poyezdlar ikki shahar oralig‘ini avvalgidan ikki barobar tezroq, atigi besh soat mobaynida bosib o‘tishi mumkin.