Mao Szedunning maktubi kimoshdi savdosida qariyb million dollarga sotildi
Xitoy Kommunistik partiyasi yetakchisi Mao Szedun tomonidan 1937-yilda yozilgan maktub Londondagi Sotheby’s kimoshdi savdosida 900 ming dollardan ortiqroq narxda sotildi. Bu haqda “Korrespondent.net” xabar beradi.
Noma Buyuk Britaniyaning Leyboristik partiyasi rahbari Klement Ettliga yo‘llangan bo‘lib, unda Mao yapon bosqinchiligiga qarshi kurashda Xitoy kommunistlariga amaliy yordam so‘ragan.
“Britaniyaliklar Xitoydagi yapon agressiyasi haqida haqiqatni bilgandan so‘ng, Xitoy xalqini qo‘llab-quvvatlash uchun birlashishiga ishonamiz”, — deyiladi maktubda.
Mao Szedun tomonidan uning Xitoy hukumati boshqaruviga kelmasdan avval yozilgan maktub xitoylik kommunistlar va G‘arb siyosatchilari o‘rtasidagi yozishmalarning dastlabki namunalari hisoblanadi.
